Avropa İttifaqının Azərbaycan Respublikasındakı nümayəndəliyi Ədliyyə Nazirliyinin Ədliyyə Akademiyası tərəfindən ilk 49 mediatorun sertifikatlaşdırılmasına dəstək göstərmişdir.

Mediation.az saytı Media Şurasına istinadən xəbər verir ki, Avropa İttifaqı tərəfindən maliyyələşdirilən “Mübahisələrin Alternativ Həlli və əhaliyə hüquqi yardım göstərilməsi” layihəsi çərçivəsində mediasiya fəaliyyətinin təmin edilməsi ilə əlaqədar müvafiq tədbirlər görülməkdədir. 21 sentyabr 2020-ci il tarixdə keçirilən tədbirdə ilk dəfə olaraq 49 mediatora sertifikatlar təqdim edilmişdir.


Mediatorların ilkin hazırlığı üzrə təlimlər cari ilin may-avqust aylarında, hər bir qrup üçün 52 saat müddətində keçirilmişdir. Təlimlərə cəlb edilən 60 nəfərdən 49 nəfər təlimləri uğurla başa vurmuş və müvafiq komissiya qarşısında imtahanı müvəffəqiyyətlə keçmişdir.


Tədbir zamanı Avropa İttifaqının Azərbaycan Respublikasındakı səfiri Kestutis Yankauskas və Azərbaycan Respublikası Ədliyyə Nazirliyinin Ədliyyə Akademiyasının rektoru vəzifəsini icra edən Elçin Xələfovun çıxış etmiş, gələcək mediatorlara fəaliyyətlərində uğurlar arzulamışdır.


Növbəti addımlar olaraq, Avropa İttifaqının maliyyə dəstəyi ilə müraciət etmiş digər namizədlərin təlimlərə cəlb edilməsi, Respublikanın bütün regionlarında mediasiyanın inkişafının dəstəklənməsi və mediasiyanın təbliğatı nəzərdə tutulur.

Mediation.az